L’actividaes de branu entamaes pol Conceyu tornen a incorporar cuatro talleres n’asturianu, trés en xunetu y ún n’agostu. Van desendolcase na Escuela de Comerciu y nel tendeyón del Muséu del Pueblu d’Asturies y tán destinaos a neñes y neños de 4 a 12 años.
Esti miércoles camudóse de manera oficial el nome la vía dedicada al rei d’España, agora monarca eméritu, Juan Carlos I. Depués del preste de la xunta de gobiernu ésta pasa a llamase avenida de José Manuel Palacio Álvarez n’homenaxe al primer alcalde democráticu.
El socialista Manuel Ángel Vallina tomo posesión del so cargu de conceyal nel Plenu últimu en sustitución d’Alberto Ferrao y va encargase de les competencies de Cultura. El Conceyu aprobó por mayoría absoluta la modificación de creitos que permitirá financiar les inversiones previstes pal 2021 na modificación presupuestaria.
‘Gijón te merece’ ye’l nome del plan que va poner en marcha’l Conceyu pa reactivar el sector turísticu esti branu, promoción na que s'escaez el topónimu asturianu. Va consistir nuna nueche d’hotel de baldre al contratar dos pa disfrutar del 16 de mayu al 30 de setiembre.
El PSOE y Xixón pela Izquierda (IX-IAS) sacaron alantre, col apoyu de Podemos-EQUO y Ciudadanos, la Ordenanza de Movilidá Sostenible. Ta compuesta por 158 artículos qu’afiten la prohibición p’aparcar en zones ORA a los vehículos sin pegatina ambiental dende’l 1 de xineru del 2022 y una llende a la so circulación a partir del 2026.
Manuel Ángel Vallina, siguiente na llista eleutoral del PSOE, aceptó garrar l’acta de conceyal y va encargase de les mesmes árees qu’Alberto Ferrao, esto ye, Educación y Cultura. El númberu 2 de la candidatura decidió dimitir la selmana pasada.
El conceyal d’Educación y Cultura, y númberu 2 de la llista del PSOE nes municipales, dimitió del so cargu. La renuncia va facese efeutiva nel Plenu próximu, anque’l socialista yá comunicó la so decisión a l’alcaldesa y compañeros de gobiernu alegando motivos personales.