L’avenida de Juan Carlos I yá lleva’l nome de José Manuel Palacio Álvarez

|
Avenida de Juan Carlos I

Esti miércoles camudóse de manera oficial el nome la vía dedicada al rei d’España, agora monarca eméritu, Juan Carlos I. Depués del preste de la xunta de gobiernu ésta pasa a llamase avenida de José Manuel Palacio Álvarez n’homenaxe al primer alcalde democráticu.

El 3 d’abril del 1979 tuvieron llugar les primeres eleiciones municipales, qu’en Xixón ganó’l PSOE con Palacio de candidatu. Esti xixonés de La Habana ocupó’l cargu hasta l’añu 1987, siendo responsable del gran cambiu que vivió la ciudá nestos años, sobre manera no urbanístico, impulsando la creación de zones verdes como Los Pericones o la recuperación pa la ciudadanía de L’Atalaya, ente otres munches aiciones.

Nel 1991 tornó a la Casa Conceyu como edil de Unidad Gijonesa, onde trabayó una llexislatura. Nel 2005, a los 75 años, finó por un cáncer de pulmón, y 16 años depués el Conceyu qu’ayudó a tresformar por fin da-y l’homenaxe que venía reclamándose dende hai tiempu.

Foron munches les propuestes pa bautizar una avenida o cai col so nome, ente elles la d’El Llano o La Merced, pero finalmente pasa a ocupar la que llevaba’l nome de Juan Carlos I, monarca sobre’l qu’hai investigaciones abiertes sobre posibles delitos fiscales, magar la oposición de PP, Ciudadanos y VOX. “Dellos coleutivos y entidaes ciudadanas manifestaron a lo llargo del añu 2020 el so deséu de que se produxera un cambiu de denominación de l’avenida de Juan Carlos I”, ente les que taba Asturies Nun Tien Rei, apunta’l Conceyu, que “reconoz y respeta la importancia del papel xugáu pol rei eméritu na transición democrática”, pero que considera “que los acontecimientos últimos privaron a la figura del rei eméritu de la exemplaridá que-y facía merecedor d’una cai na nuesa ciudá”.

Los servicios municipales correspondientes van proceder darréu a colocar les plaques identificatives y a comunicar a los vecinos y comercios de la vía’l cambiu de nome.

Contador Estadistiques