La segunda campaña de Bonos Xixón arranca cola novedá de que se merquen nel propiu comerciu

100.000 bonos y 660 establecimientos participantes. Son los númberos de la segunda campaña del programa promocional Bonos Xixón pa fomentar el consumu nel comerciu llocal y favorecer la so recuperación depués de los años duros de la pandemia, que nesta ocasión cuenta con delles novedaes con respeuto a la celebrada nel 2021.

La principal ye que los bonos se troquen nel propiu llocal nel momentu de la compra presentando’l DNI –ye necesario contar con 18 años pa poder beneficiase d’esti programa de Xixón Impulsa–. Na esperiencia anterior yera’l veceru’l que lu mercaba previamente na web de la iniciativa.

Nesta ocasión va haber una categoría única de bonos, de 10 euros, qu’executar por cada compra mínima de 30, cola posibilidá d’usar un máximu de 4 en cada operación: asina, d’una merca de 120 euros, el consumidor pagaría 80 y el Conceyu, 40. Cada ciudadanu tien a la so disposición 12 bonos.

Comerciu, hostelería y cultura son les categoríes de los 660 establecimientos que se sumaron a Bonos Xixón nesta ocasión. Los 100.000 bonos pueden emplegase dende ayeri y hasta’l 26 de xineru, anque ye más que posible que s’escosen enantes, yá qu'en 24 hores son munchos los comercios que yá quedaron ensin ellos.

Na semeya, Santos Tejón, conceyal de Promoción Económica, Emplegu, Turismu y Comerciu Llocal; Carmen Moreno, xerente de la Unión de Comerciantes; y Luis Díaz, xerente de Xixón Impulsa, na presentación d'esta campaña de Bonos Xixón, qu'empleguen namái la forma castellana 'Bonos Gijón'.