El programa Bonos Xixón vive un segundu periodu llueu d’una redistribución de 7.951 de los 16.329 disponibles

Dende’l 24 de febreru, y hasta’l 23 de marzu, tán activos otra vuelta los Bonos Xixón. Al nun escosase toos na primer fase, con 16.329 entá disponibles, fíxose una redistribución ente los 660 negocios participantes pa facilitar el so consumu por parte de los ciudadanos.

Les bases del programa afiten qu’aquellos que nun validaran un 25 por cientu de los bonos disponibles diben repartir los sobrantes colos que vendieran más del 75 por cientu. Mentes los que tán ente estos dos porcentaxe, caltienen los mesmos.

En total redistribúyense 7.951, 16 a caún de los 211 qu’escosaron tolos bonos y 15 a los 305 siguientes. Mentes, 8.378 siguen nel mesmu comerciu.

Nesta campaña, la segunda de Bonos Xixón, esite una categoría única de 10 euros qu’executar por cada compra mínima de 30, cola posibilidá d’usar un máximu de 4 bonos en cada operación: asina, d’una merca de 120 euros, el consumidor pagaría 80 y el Conceyu, 40, y d’una de 30 euros, 20 y 10, de manera respeutiva. Cada ciudadanu tien a la so disposición 12 bonos en total.