Abelardo dexa'l bancu del Sporting

L'entrenador catalán Rubi, ex del Levante, Valladolid y Girona, garra l'equipu.

Esta mañana Abelardo dio una rueda de prensa de despidida col tamién dueñu de la sociedá na que, ente llárimes, esplicó que nun se sentía identificáu col espíritu qu'amosaba l'equipu nel campu, considerando que la so marcha yera lo meyor pal Sporting. El xixonés, con contratru hasta 2020 que nun va cobrar, señaló que nun yera la primer vegada que ponía'l cargu a disposición del club y que n'avientu yá lo fixera, pero Fernández lu convenció pa que siguiera.

El nuevu entranador, Rubi, nun lo tendrá fácil, tendrá que recuperar pa la competición a un equipu nortiáu que suma 5 de los 45 puntos últimos, racha que lu dexa nel puestu 18 a cuatro de la salvación que marca'l Valencia, y dos derrotes en Copa. Una situación insostenible que llevó a Abelardo a presentar na mañana d'ayeri la so dimisión al presidente Javier Fernández y que fixose pública a última hora de la tarde.

La meyor etapa, nel Girona

Güei, xornada na que tamién se celebra la xunta xeneral d'aicionistes, va ser presentáu Joan Francesc Ferrer 'Rubi', téunicu de 47 años que se fixo un güecu nel mundu del fútbol profesional na temporada 2012-2013 nel Girona. Col club catalán, que venía de salvar la categoría in extremis, firmó una campaña escelente, finando nun meritoriu cuartu puestu y rozando l'ascensu, que perdió na última eliminatoria del play-off col Almería. 

El so bon facer permitió a Rubi entrar nel equipu téunicu de Tito Vilanova pa centrase na preparación de la estratexa, pero la situación de salú del entrenador del Barcelona impidió-y continuar nel cargu. Pese a ello'l téunicu roxiblancu nuevu siguió integráu na estructura del club cola llegada del Tata Martino.

Llueu, na 2014-2015, el Valladolid confiaría-y un proyeutu pa retornar a Primera División, ensin ésitu. Tampoco lo consiguiría la temporada pasada nel Levante, cuando'l club granota lu llamó a finales d'ochobre tres la destitución de Lucas Alcaraz pa tratar de salvar una situación asemeyada a la del Sporting esti añu, no que foi'l so debú en Primera División.

A la so llegada a Xixón, el de Vilassar de Mar, dixo tar arguyosu pol interés del club de Mareo y aseguró qu'entovía hai tiempu pa reconducir la situación y salvar la categoría.