Xixón cumple 12 años d’estación de tren provisional

|
Estación de tren de Xixón

El 27 de marzu del 2011 entraba na estación de L’Humedal l’últimu tren depués de más de 150 años de vida útil y treslladábase asina tol tráficu ferroviariu a la provisional de Sanz Crespo. Aína recuerda esti aniversariu, 12 años de provisionalidá, con crítiques a la dexadez col nomáu Solarón y les perdes de ‘Gijón al Norte’.

L’agrupación llocal de la formación asturianista de creación nueva empicipia la so actuación política enfocando esti tema. Asoleya en redes sociales delles infografíes con información al respeuto y rescampla “la baxada de xente qu'usa les cercaníes dende que tán en Sanz Crespo –un 33 por ciento menos nestos 12 años– o que los terrenos del Solarón lleven tou esti tiempu paraos, a la espera d'una operación inmobiliaria nuna ciudá que pierde población y con alredor 15.000 viviendes vacíes”.

Sobre ‘Gijón al Norte’ califica’l casu de “mui sangrín”. Esta sociedá participada pol Conceyu, Gobiernu, ministeriu, Renfe y Adif que, dende'l 2002 xestiona’l Plan de víes “presenta unes cuentes alarmantes: debe 43 millones de préstamos que recibió de Fomentu, Principáu y Ayuntamientu y nos dos últimos años perdió 996.635 euros. Too ye más llamativo si se tien en cuenta qu'esta sociedá namás tien tres trabayadores qu'en 2022 supunxeron un coste de 241.247 euros”.

Dada la situación, Aína llama a “potenciar les cercaníes –porque vertebren el territoriu, son menos contaminantes y yá hai una infraestructura creada que pue dar muncho más de sí–; tener una estación más accesible –con una meyor conexón col centru y los barrios a traviés de llínies d’autobús, d’un serviciu llanzadera, de la rede municipal de bicis…–; dar una solución al Solarón –que los milenta metros cuadraos abandonaos sean útiles pa les necesidaes de la ciudá y non pa la especulación inmobiliaria–; y esixir responsabilidaes a ‘Gijón al Norte’, porque nun pue ser qu’acumule pérdides millonaries y hipoteque a la ciudá ensin dar nenguna solución a esta cuestión”.

Na semeya, estación actual de tren de Xixón, creada nel 2011 pa ser provisional.

Contador Estadistiques