L'aniversariu de la destrucción de Xixón

L'aniversariu de la destrucción de Xixón

El pasáu 6 de setiembre de 2018 cumplíeronse 628 años de la destrucción de Xixón, o lo que yera lo mesmo daquella, de Cimavilla.

Tres una tregua de 6 meses, depués de les hostilidaes en 1394 ente los partidarios del conde asturianu  Alfonso Enríquez (fíu bastardu del rei Enrique II) y los defensores de la causa del rei de Castiella, el 30 de xunetu de 1395 les tropes reales taben otra vuelta en Xixón y entamaben l'asediu definitivu d'una ciudá que defendía la princesa portuguesa y el so capitán Lope Cortes de Parres. La cosa nun yera nueva, les rebeliones de la década anterior, en 1381 y 1383, y les guerres civiles ente los partidarios del rei y del conde, provocaren la creación del Principáu d'Asturies en 1388, pa xuncir asina'l país al control directu de la corona.

Emburriaos pola fame y la enfermedá los defensores de Xixón yá nun son a resistir, y nos primeros díes de setiembre tienen de dase y fuxir per mar hacia les tierres franceses en poder de la corona británica, onde siguía buscando apoyu a la so causa'l conde de Noreña y eternu rebelde contra la corona castellana; Alfonso Enríquez.

Dicen les cróniques más fiables que “el rei, que nun pudo desfogar el so furor contra la valerosa heroína, mandó pone-yos fierro, y fueu, a la Villa y al Castiellu” de Xixón, y como castigu a la rebelión y avisu pal futuru nun quedó piedra sobre piedra, desfaciéndose sistemáticamente la muralla romana y tolos edificios.

Yá nel sieglu XVIII correríen histories apócrifes y falses sobre la supuesta quema de Xixón per parte de la condesa o la presencia na mesma del pirata Harry Pay, pero yá Xovellanos y Caveda y Nava desmintieron unes histories que namás pretendíen xustificar o minimizar l'apoyu d'una parte de los xixoneses y los asturianos a un conde y una princesa que pasaron a la historia, escrita polos vencedores, como traidores.

Na semeya:  Bolaños pa bombarda, proyeutiles del piedra emplegaos poles tropes castellanes nel asediu a Xixón. Anguaño llantaos na puerte del Palaciu Valdés (Xixón).

Contador Estadistiques