Los Reis Magos van recibir n'El Bibio

La Conseyería de Salú nun da autorización al plan municipal pa que les sos maxestaes percuerran tolos barrios el 5 de xineru.

Yá había constancia de que nun habría cabalgata de Reis, pero l'alternativa plantegada pol Conceyu tampoco va ser posible. Ésta consistía en llevar en coche a Melchor, Gaspar y Baltasar a tolos requexos de la villa pa torgar asina axuntamientos importantes de xente.

El plan municipal nun recibió'l preste de Salú, polo que va activarse l'alternativa yá prevista: un recibimientu na plaza de toros d'El Bibio. Toles neñes y neños van poder saludar a los Reis Magos los díes 4 y 5, pero han pidir cita al traviés d'una vía que Divertia va anunciar nos díes próximos.

Na so estancia en Xixón, los trés magos procedentes d'Oriente tamién van grabar vídeos xunto con Aliatar dirixíos a aquelles persones que nun se puedan averar a saludar a les sos máxiques maxestaes.

Na semeya, Baltasar nuna visita a Xixón.