El Motive.co sentenció la eliminatoria en Mestrino

|
Motive.co La Calzada en Mestrino

Les de La Calzada debutaron na EHF European Cup con una victoria contundente: 21-40.

Nun pudo tener meyor debut en competiciones europees el Motive.co, que se desplazó'l vienres al Vènetu pa xugar el sábadu la primer eliminatoria –en realidá ye la segunda ronda– del segundu tornéu continental de balonmanu femenín contra l'Alì-Best Espresso Mestrino. Les italianes nun foron rival de les xixoneses, que salieron mui metíes nel partíu, como amuesa'l 1-5 nel macador a los seis minutos y el 10-21 al descansu.

Cristina Cabeza pudo repartir minutos ente toles sos xugadores, que ganen asina esperiencia de cara a futuros duelos nesti ilusionante tornéu pol que naguaba tanto'l club. Sicasí, primer ha xugase la vuelta, primer partíu européu del balonmanu asturianu de llocal, partíu que va tener llugar el sábadu a les 15 hores nel pabellón de L'Arena.

Na semeya, les xugadores llucen la bandera d'Asturies nel Palasport Lissaro de Mestrino xunto con téunicos, direutivos y el conceyal d'Actividá Física, Deporte y Distritu Rural, José Ramón Tuero, que se desplazó al Vènetu col equipu.

 

Contador Estadistiques