Xixón yá tien mázcares personalizaes col logu del conceyu a la venta

L’usu de mázcares ye obligatorio n'Asturies en cualquier espaciu de les zones urbanes y va selo hasta la llegada d’una vacuna o d’un tratamientu eficaz contra la COVID-19. Xixoneses y turistes pueden agora protexese del coronavirus SARS-CoV-2 con unidaes hixéniques reutilizables col logu n’asturianu del conceyu.

Pol preciu de 5 euros tán a la venta estes mázcares en dos colores, blancu y prietu. Pa facese con elles hai qu’averase a les oficines de turismu de la villa, na Escalerona y la recién estrenada de Casa Paquet, n’El Muelle.

Visitantes y xixoneses van poder escoyer ente 4 modelos, colo logu n’asturianu o en castellanu. Les mázcares aguanten cerca de mediu centenar de lavaos, qu’han de facese a más de 60 graos.