Xixón Tours estrena trés rutes nueves pela villa n’asturianu

Per cuartu añu ye posible ver nel branu xixonés grupos de llocales y turistes percorriendo la villa siguiendo’l filo d’una historia o una temática en llingua asturiana. Torna Xixón Tours, que nesta ocasión estrena trés salíes bien interesante: ‘El Xixón de Xosefa y Gaspar de Xovellanos’, ‘Xixón golfu’ y ‘Xixón y les traxedies de la mar’.

Nacida pa dar a conocer Xixón al traviés d’aspeutos munches veces desconocíos pa los propios xixoneses, esta iniciativa repite tamién dalgunos de los grandes ésitos de los trés branos anteriores, como ye ‘Xixón mete mieu’, que lleva a los participantes a los llugares históricos onde se produxeron asesinatos, matances, invasiones sangrines, apaiciones de pantasmes y lleendes, permiendo a los presentes el conocer los sitios más escuros, terroríficos y misteriosos de la historia de la ciudá de Xixón. Arantza Margolles ye la so responsable, qu’esti añu tamién va guiar ‘Xixón y les traxedies de la mar’ y ‘Xixón golfu’.

El primeru va contar a los presentes les traxedies más desconocíes venceyaes cola mar que vivió la ciudá na metá última del sieglu XIX y la primera del XX, con salida del Muséu del Ferrocarril y final en Campul Valdés llueu de pasar pela Vieya Rula. Los naufraxos mientres la Primer Guerra Mundial, les lleendes del Reina Regente, xoya de la marina española, y hasta barcos pantasma, como ye’l casu del Mary Celeste, van ser rellataos por Margolles.

Mentes, ‘Xixón golfu’ va centrase nos diferentes tipos de golfos que cometieron crímenes na villa. Va salir de la plaza del Seis d’agostu y finar na cai Institutu llueu de percorrer el centru.

L’espertu xovellanista Pablo Vázquez Otero va encargase de la cuarta salida propuesta, ‘El Xixón de Xosefa y Gaspar de Xovellanos’. La ruta va centrase en Cimavilla pa conocer la vida, obra y legáu de los hermanos Gaspar Melchor y Xosefa Xovellanos.

Salíes próximes

Les feches próximes na que poder participar nestes cuatro rutes guiaes n’asturianu son les siguientes: mañana a les 20 hores, ‘Xixón mete mieu’; el sábadu, a les 20 hores, ‘El Xixón de Xosefa y Gaspar de Xovellanos’; el vienres 30 ,a les 20.30 hores, ‘Xixón y les traxedies de la mar’; y el sábadu 31, a les 20 hores, ‘Xixón golfu’. Les visites tienen un preciu de 10 euros, de 8 euros pa los menores de 18 y de baldre pa los de 12, siendo necesario acutar plaza na web de Xixón Tours.

Na semeya, ún de los grupos de 'Xixón mete mieu' del branu pasáu.