Xixón planta’l so Texu de l’Alcordanza n’homenaxe a les víctimes de la COVID-19

|
Texu de l'Alcordanza de Xixón

El parque de Los Pericones foi’l llugar escoyíu pol Ayuntamientu pa plantar el Texu de l’Alcordanza n’homenaxe a les víctimes xixoneses de la COVID-19. Tola corporación acudió a Ciares, onde s’asitió esti árbol sagráu pa los ástures que’l Gobiernu repartió pelos conceyos.

L’alcaldesa Ana González encargóse de plantar el sábadu esti texu, al que lu acompaña una placa billingüe conmemorativa que, baxo’l nome de ‘Texu de l’Alcordanza’, reza “N’alcordanza de les víctimes de la Covid-19”. D’esta forma preténdese tener un memorial vivu pa toles persones que perdieron la vida estos meses afeutaos pola enfermedá provocada pol coronavirus SARS-CoV-2.

Xixón xúnese asina a otros munchos conceyos que yá plantaran esti árbol sagráu pa los ástures y otro munchos pueblos, venceyáu a la vida, pero tamién a la muerte, al ser venenosu, simbolizando’l pasu al otru mundu, siguiendo asina la idea del instaláu pol Executivu na redolada del Hospital Universitariu Central d’Asturies (HUCA), xunto a la uviéina ilesia de La Cadellada, que repartió exemplares per cada ayuntamientu. El que recibió Xixón llucirá nos sieglos próximos en Ciares, cerca de la entrada del cementeriu, pa que les víctimes de la COVID-19 nun queden nel escaezu pol pasu del tiempu.

Contador Estadistiques