Un llibru repasa la evolución de la imaxe de Pelayu nel escudu de Xixón

|
'L’escudu d’armes de Xixón. La iconografía de Pelayu', de Xuan F. Bas Costales recortada

‘L’escudu d’armes de Xixón. La iconografía de Pelayu’ ye’l títulu del llibru últimu de Xuan F. Bas Costales. Trátase d’un ensayu sobre la evolución que vivió'l sellu distintivu de la ciudá dende que se creó a entamos del sieglu XVII, analizando los cambios na imaxe de Pelayu.

El profesor de Xeografía y Historia, y de Llingua Asturiana y Lliteratura en Secundaria y Bachilleratu, amás de correutor ortotipográficu y traductor, afondó nesta investigación a partir d’un capítulu d’un llibru sobre la historia de Xixón editáu pol Conceyu nel 2006 que s’entitulaba ‘Una historia de papel. 500 años en los documentos del AMG’. “Yá daquella pensé que yera un testu bien guapu p'asoleyar de forma independiente; de mou que, años depués, con dalgo de tiempu, pudi dedicame a enanchar el testu orixinal a la par que-y daba un enfoque distintu y lu tornaba al asturianu”, esplica.

Asina naz esti llibru, primeru qu’asoleya Cuatro Gotes na coleición ‘Alfredo Villa y Villa’ d’investigación y ensayu n’asturianu. Nél faise un percorríu pelos cambios polos que pasó esi distintivu de la ciudá, dende entamos del sieglu XVII, “cuando s’acordó facer un sellu d’armes cola persona del infante Pelayu. Una imaxe que foi camudando y usando modelos estremaos hasta que nel 1949 el Conceyu dexó afitao l’escudu oficial de Xixón cola figura del rei Pelayu afatáu como un guerreru godu, con cota de mayes, túnica, capa, corona y cruz de la victoria con blagu na manzorga y espada apuntando al suelu na mandrecha”, apunten dende la editorial.

Bas analiza con detalle, cola ayuda d'ilustraciones, “los cambios polos que pasó Pelayu en sellos, edificos y otres instituciones oficiales onde s’usó esi escudu d’armes”.

 

Contador Estadistiques