Montes Torrecilla dexa de contar pal Sporting, qu'apuesta por Javi Rico como sustitutu

|
Javi Rico Sporting

El 30 de xunu va finar la trayeutoria de Miguel Montes Torrecilla como direutor deportivu del Sporting. El conxuntu roxiblancu nun va renovar el contratu del salmantín tres nun algamar oxetivos nes trés campañes que lleva nel club y va ceder la responsabilidá al xixonés Javi Rico pa los trés años próximos, que procede del equipu de collaboradores de Roberto Olabe na Real Sociedad.

La situación actual pola crisis sanitaria por cuenta la pandemia de COVID-19 va obligar a allargar la temporada actual, paralizada dende’l 13 de marzu, más allá del 30 de xunu. Esi día va finar la vinculación col Sporting de Montes Torrecilla, que yá nun va planificar la campaña siguiente.

El so sustitutu ye Javi Rico, ex futbolista del Sporting Atlético que llegó a xugar en Segunda col Nàstic, y que tien una esperiencia amplia nos despachos y como axente. Foi’l responsable de la secretaría téunica del Pontevedra, onde destacó como futbolista, per siete años, pa llueu trabayar pal Valladolid, Zaragoza y Real Sociedad.

Del club donostiarra procede, onde sirvió d’apoyu a Roberto Olabe, col que yá collaborara nel Valladolid como coordinador del Departamentu d’Observación. Una de les primeres decisiones de Rico va ser la continuidá de Miroslav Djukic, con contratu hasta’l 30 de xunu con renovación nel casu de play-off, anguaño a cinco puntos cuando falten 11 xornaes.

Trés fracasos

La trayeutoria de Montes Torrecilla pue resumise cola pallabra ‘fracasu’. La primer campaña, con un potencial económicu importante p’afrontar el retornu a Primera, tuvo marcada con un mal comienzu de temporada con Paco Herrera nel bancu que llueu Rubén Baraja nun pudo salvar, cayendo na primer eliminatoria pol ascensu col Valladolid.

Nin la segunda temporada, con relevu nel bancu, nin la tercera con José Alberto al frente, el Sporting amosóse como un candidatu real al ascensu. Más de 30 fichaxe fixo’l salmantín nestos 3 años, con numberosos xugadores que pasaron ensin pena nin gloria, munchos cedíos y poca apuesta por Mareo a pesar de los futbolistes del filial que dieron el pasu l’añu pasáu.

Como aciertos tán les incorporaciones de Santos, Rubén García, Barba, Calavera, Geraldes, Manu García o la última de Murilo, amás del retornu de Jony. Tamién hai que destacar les sos bones operaciones nos trespasos fechos nesti tiempu, con ventes mui beneficioses pal club. 

Contador Estadistiques