Martí garra’l timón del Sporting, “el retu más importante na mio carrera”

|
Pep Martí

La derrota del Sporting el domingu n’El Molinón cola Ponferradina (2-3) condenó definitivamente a David Gallego, que nun va cumplir la segunda temporada al frente del buque roxiblancu. Garra’l timón Pep Martí, que firma pa esta campaña cola opción a una segunda por oxetivos que nin el téunicu nin Javier Rico confirmaron.

“Creo que ye’l retu más importante que tengo na mio carrera, curtia como entrenador, pero cola suerte de que como xugador tuvi la gran suerte de xugar hasta los 40 años”, aseguró’l balear, de 46 años, que, sicasí, sí tien una importante esperiencia en Segunda División. Debutó col Tenerife en payares del 2015 pa sustituyir a Raúl Agné cinco meses depués de colgar les botes nel Mallorca, y dirixó al cuadru chicharrero en 108 partíos, clasificándolu pa les eliminatories pol ascensu na so segunda campaña.

Destituyíu nel mes de febreru de la so tercer temporada, Josep Lluís Martí dirixó llueu al Deportivo, al Girona y al Leganés con desigual fortuna. Los meyores númberos túvolos n’A Coruña, al finar en sesta posición llueu de garrar al equipu n’abril, ensin suerte nel play-off al caer nel partíu decisivu col Mallorca.

“Tengo una plantía que tien un bon potencial”, aseguró Martí na presentación, que dixo querer “tresmitir a los xugadores” y reenganchar a l’afición col equipu. “Queremos ser un equipu valiente, vertical, que tresmita pasión por esti deporte y esti escudu”, añadió.

Contador Estadistiques