Mario González ye'l delanteru escoyíu

El Sporting, que yá conoz la fecha del derbi, apuesta pol ex del Tenerife, que llega cedíu por Los Angeles FC de la estauxunidense MLS.

El castellanu Mario González ye'l refuerzu escoyíu pol Sporting de cara a la segunda vuelta en marcha nel oxetivu de sumar goles na delantera pa lluchar pol ascensu. Llegó'l martes a Xixón, ayeri entrenó colo sos compañeros y güei tuvo la presentación oficial.

En principio, pendiente de la situación de Jeraldino y el compromisu del club con Bamba, va ocupar la ficha de Jordan Carrillo, de vuelta en Santos, y podría viaxar mañana a Tenerife pa enfrentase'l sábadu a les 18.30 hores al únicu equipu col que tien esperiencia en Segunda. Foi na segunda vuelta de la temporada 21-22, anotando 6 goles col cuadru 'chicharrero', col que llegó a la final de les eliminatories pol ascensu col Girona.

Propiedá del Sporting Clube de Braga, enganchó una cesión nueva, nesta ocasión a la Primera belga col Lueven, onde anotó 13 goles que llamaron l'atención de Los Angeles, hasta'l puntu de pagar 3 millones por él. Nun acabaría trunfando na MLS, de la que resultó subcampeón, marcando 1 gol en 12 partíos (8 de la lliga regular, 3 de play-off y 1 de Copa), polo que l'equipu californianu buscó-y una salida una vegada finada la temporada, que n'Estaos Xuníos fina al entamu d'avientu.

Agora busca'l so sitiu en Xixón, onde llega cedíu con opción de compra, obligatoria en casu d'ascensu. Un delanteru de calidá, con movilidá, que nun tien el perfil de rematador que precisaba l'equipu, pero que resulta una opción mui aprovechable nel siempre difícil y caru mercáu d'iviernu.

De sábadu col Uviéu

Esta mañana LaLiga dio a conocer l'horariu de la vuelta del derbi. El Sporting va recibir al Uviéu'l sábadu 10 de febreru a les 18.30 hores.

Na semeya, David Guerra, presidente executivu del Sporting, y Mario González na presentación d'esta mañana del xugador.