Los años 70 rellumen nel calendariu del Pueblu d’Asturies y la Oficina de Normalización del 2022

El miércoles 15 va entamar el repartu del mui demandáu calendariu del Muséu del Pueblu d’Asturies y la Oficina de Normalización Llingüística. Per tercer avientu llega esta propuesta n’asturianu qu’amuesa cada mes una semeya de Xixón del fondu fotográficu de la institución, nesta ocasión correspondiente a la década de los 70.

L’avance teunolóxicu vivíu nesi tiempu permite qu’esti calendariu tenga per primer vegada imáxenes en color, anque entá calitén dalguna en blancu y prietu. La plaza los Mártires, el Xixón industrial, El Muelle, la Fiesta la Cultura en Los Maizales, l’hípicu o la Plaza Mayor protagonicen dalgunes de les semeyes.

La xente interesao en facese con un exemplar de ‘Xixón. Años 70’ pue pasar dende mañana pel Centru de Cultura Antiguu Institutu y pel Muséu del Pueblu d’Asturies. Dada la demanda, namái va entregase ún por persona.