Llan de Cubel toca na XXIII Nueche Celta de Granda

|
Llan de Cubel toca na XXIII Nueche Celta de Granda

Col final de xunetu lleguen les fiestes de Santana de Granda y, fiel a la cita, la Nueche Celta. Llan de Cubel encabeza’l cartelu de la ventena tercera edición d’esta folixa na Carbayera, que completen Caldo y Os Rabizos, y Eva Tejedor & Les Pandereteres.

El Grupu Folclóricu Trebeyu va encargase d’abrir les actuaciones a les 21 hores, pa depués dar pasu a una de les formaciones que más ta faciendo baillar a les asturianes y asturianos nos años últimos. Dende l’occidente vienen Caldo y Os Rabizos pa interpretar cantares tradiciones del Eo-Navia.

Darréu va ser el turnu d’Eva Tejedor & Les Pandereteres, que tán acabantes d’asoleyar el so primer trabayu, ‘L’entamu’. Va encargase de zarrar la Nueche Celta la banda con más nome del folk asturianu, Llan de Cubel, que tien nel fornu’l tan esperáu sestu discu de la formación.

Dos verbenes

Dende’l martes hai actividaes en Granda poles fiestes de Santana, anque la mayor actividá concéntrase mientres la fin de selmana, col entamu de dos verbenes. La primera ye esta nueche col DJ Vas Bailar, mentes que mañana, además de la pinchada, va haber una actuación de Tekila.

El llunes, Marsella va poner la música al fin de fiesta tres la cena de xeremandía de les vecines y vecinos de la parroquia.

Contador Estadistiques