La Universidá Popular torna a ufrir el cursu de ‘Llingua asturiana’ en llinia

|
Cartelu cursos UP Xixón 2021-2022 recortáu

Esti martes abre’l plazu d’inscripición pa los 126 cursos y talleres qu'ufierta la Universidá Popular, con matriculación escalonada según el centru nel que se celebre. El de ‘Llingua asturiana’ torna a ser en llinia, con clases los martes de 20 a 21.30 hores, y la inscripción va tar disponible dende’l vienres.

Los de les Aules de Música y del Centru de Cultura Antiguu Institutu son los primeros que van a activar la matriculación, mañana, pa siguir el día siguiente l’Atenéu de La Calzada, El Natahoyo, Taller de Cerámica, Muséu Nicanor Piñole, Muséu del Ferrocarril y Escuela de Comercio. El xueves va ser el turnu de los de Pumarín-Xixón Sur, El Coto, L’Arena, el Xardín Botánicu Atlánticu y El Llano, quedando pal final, el vienres, los cursos non presenciales.

Ente ellos ta’l de ‘Llingua Asturiana’. Tien una ufierta de 14 plazas y el so preciu ye de 40 euros, con clases los martes, dende’l 19 d’ochobre, de 20 a 21.30 hores, hasta sumar un total de 40 hores llectives.

La matrícula va tar abierta hasta’l día 30. Nesti primer periodu que va d'ochobre a febreru, qu’arranca’l día 6, la Universidá Popular cuenta con 126 cursos programaos de temática estremada como la fotografía, el teatru, la danza, la cocina, la historia, l'arte, el dibuxu, la cerámica, la restauración de muebles, la informática y Internet, castellanu pa estranxeros o preba de vinos, ente otros.

AdxuntuTamañu
PDF icon Cursos UP Xixón 2021-2022219.49 KB
Contador Estadistiques