La ‘Semana Negra’ resiste al coronavirus dende l’Antiguu Institutu

|
Trabe na 'Semana Negra' 2020

Ensin ferial, pero calteniendo l’espíritu de los sos oríxenes, la XXXIII ‘Semana Negra’ va celebrase nes sos feches habituales dende esti vienres y hasta’l día 12 nel Antiguu Institutu. Les actividaes van ser presenciales, cola posibilidá de siguir munches en llinia, ente ellos los conciertos de Felpeyu, Toli Morilla Silvia Quesada y Anabel Santiago, y va contar con puestos de llibros nel esterior.

La ‘Semana Negra’ resiste asina a la crisis sanitaria por cuenta la pandemia de COVID-19 y va convertir Xixón na “capital literaria del mundu per diez díes”, como afirmó’l so direutor Ángel de la Calle. Nun va perder el so calter festivu y popular, cola oportunidá agora de llegar a tol mundu al traviés de la rede.

Les actividaes van ser con aforu reducíu, polo que la xente interesao ha de sacar entrada, siempre de baldre, na web del certame lliterariu a partir de les 9 hores del día anterior. La música nun va faltar na programación, con conciertos de bandes y artistes en llingua asturiana como Felpeyu (esta nueche, con tickets escosaeos), Toli Morilla (llunes), Silvia Quesada (martes) y Anabel Santiago (vienres) con entamu previstu pa les 22.30 hores.

Nel esterior, na cai Tomás y Valiente, instaláronse puestos de llibros, cola presencia de Trabe –con llibros propios y de Saltadera–, ente otres editoriales y llibreríes habituales nel festival, que van tar abiertos de 11 a 14 y de 17 a 22 hores. Na web de la ‘Semana Negra’ pue consultase tola programación presencial y en llinia, asina como conocer toles novedaes d’esta edición del gran festival internacional dedicáu a la lliteratura prieta.

Na semeya, el puestu de Trabe nesta 'Semana Negra'.

Contador Estadistiques