La escultura ‘Nordeste’ torna al so llugar

|
'Nordeste' tres la so restauración nel 2020

Una vegada finada la restauración de la obra de Joaquín Vaquero Turcios, ésta yá ta colocada nel so llugar en Cimavilla. Ye ún de los monumentos y escultures que’l Conceyu ta tratando y llimpiando dende lo último del 2019 pa la so conservación nun bon estáu.

‘Nordeste’ presentaba perdes importantes de material por corrosión del aceru y polos filtrados d’humedaes, asina como desplacados o pintaes. Inaugurada nel 1994, la escultura retiróse a entamos de xunetu y taba previsto que tornara al so llugar en setiembre, pero los trabayos s’allargaron y nun se reinstaló hasta esta mañana.

Esta intervención forma parte del ‘Proyeutu de conservación y restauración d’obres d’arte públicu de Xixón’ desendolcáu pola Conceyalía d’Educación y Cultura. Otres actuaciones feches hasta’l momentu son la de ‘Génesis’ (1992), de Joaquín Rubio Camín, en Begoña; ‘Castillo de Salas’ (2003) de Rubio Camín, nel Camín de Peñarrubia; ‘Monumento a la paz mundial’ (1990), de Manuel Arenas, nel parque d’El Lauredal; ‘Decoración del parque d’El Lauredal’ (1986-1988), del Grupo G; ‘Monumento a Fleming’ (1955), de Manuel Álvarez Laviada y Luis Moya, nel parque Isabel la Católica; ‘Cubo’, d’Alejandro Mieres, en L’Humedal; ‘Stairway to heaven’ (2012), de Mossel, en Cimavilla; y ‘Monumentu a Xovellanos’ (1891), de Manuel Fuxá, na plaza del 6 d’agostu.

Contador Estadistiques