La celebración del Antroxu anima la villa

El Xueves de Comadres dio pistoletazu a cinco díes de folixa, gastronomía y mazcaritos.

Xixón yá vive l'Antroxu. Dende güei y hasta'l martes la villa va disfrutar d'un ambiente festivu que yá se pudo notar anueche cola tradición de les Comadres.

Magar que l'agua desllució la primer xornada antroxera, la predicción de l'Axencia Estatal de Meteoroloxía (Aemet) promete un ameyoramientu progresivu del tiempu. Inclusive nun da agua pa la tarde del Llunes d'Antroxu, cuando va celebrase'l desfile ente El Bibio y L’Humedal a les 19 hores, una de les actividaes centrales del Antroxu, cuando la mayor parte de la xente s'anima a amazcaritar y allarga la folixa tola nueche.

El Martes d'Antroxu, festivu llocal, ye cuando los restoranes suelen enllenase pa comer los productos y postres típicos d'esti tiempu. El gochu ye protagonista, y el menú de les xornaes entamaes na hostelería, yá en marcha, ta compuestu por pote, picadiellu, frixuelos y picatostes.

Tamién ye cuando va celebrase l'entierro de la sardina, Turbu, que ta pasándolo podre estos díes. El veloriu ta previstu a les 17 hores en Begoña, col cortexu fúnebre programaú pa les 19.15 hores y la llectura del so testamentu a les 20.15 hores na plaza’l Marqués.

Amás, l'Antroxu xixonés tien un ampliu programa que se pue consultar al final d'esta noticia.

Na semeya, grupos de muyeres celebren ayeri Comadres nel restorán Savannah.