La bona situación epidemiolóxica lleva a desmontar l’hospital provisional de la Feria

Asturies ta llibre de COVID-19, ensin casos nuevos nes dos selmanes últimes. Esta bona situación epidemiolóxica lleva al Serviciu de Salú del Principáu d’Asturies (SESPA) a desmontar l’hospital de campaña instaláu nel Recintu Ferial Luis Adaro nel estáu d’alarma, que nun fixo falta abrir pola incidencia baxa del coronavirus SARS-CoV-2.

A últimos de marzu comenzó’l llevantamientu del hospital H144 nel pabellón central p’afrontar una pandemia del que se desconocía’l so algame, tando operativu dende la selmana del 6 d’abril. Agora, cuasi 3 meses depués, desmóntase cola satisfaición de que nun tuvo que ser necesariu.

La xerente del SESPA, Concepción Saavedra, esplicó qu’esti pasu llega pol “escenariu epidemiolóxicu actual, onde llevamos más de dos selmanes con cero casos diagnosticaos y nun hai nengún centru residencial activu”. Mentes, Salú tien diseñáu un plan de continxencia pa responder a un aumentu posible de la incidencia del coronavirus tres l’apertura de la movilidá tres el final del estáu d’alarma.

Na semeya, una de les 144 cames disponibles na Feria p'acoyer pacientes con COVID-19.