Irarragorri confirma los trés rivales del Sporting na so pretemporada en México

|
Alejandro Irarragorri

Amás de Santos y Atlas, los otros dos equipos d’Orlegi Sports, el Sporting va contar col Club Atlético La Paz como tercer rival de la so pretemporada mexicana. El conxuntu roxiblancu va visitar asina esta población de Baja Californa, Torreón y Guadalajara en xunetu xunto con una delegación comercial, confirmó’l presidente Alejandro Irarragorri.

El primer partíu va celebrase’l 16 de xunetu nel Nuevo Estadio Corona contra’l Santos, mientres que 3 díes depués ta previstu una enfrentamientu con Atlas nel Estadio Jalisco. Va zarrar esta xira, que coincide col 70 aniversariu de la histórica a Cuba y México, el 23 nel Estadio Guaycura’l choque col Atlético, conxuntu de la Liga de Expansión MX –segunda categoría mexicana ensin posibilidá d’ascensu– creáu va un añu depués de la venta d’Orlegi de la franquicia Tampico Madero al empresariu tequileru Arturo Lomelí.

El primer equipu roxiblancu va tar acompañáu estes xornaes por una misión comercial formada por empresarios asturianos, col oxetivu de crear contautos con firmes llocales. Avanzólo Irarragorri na presentación del RSG Business Club, un club de negociu que pretende dinamizar el texíu entamador del país, actu que tuvo llugar n’El Molinón y nel que participó como convidáu Javier Tebas, presidente de LaLiga, y nel que tamién tuvo presente l’alcaldesa Ana González Rodríguez; el vicepresidente d’Asturies, Juan Cofiño; la presidenta de la Federación Asturiana de Empresarios (FADE), María Calvo; y representantes de les cámares de comerciu de Xixón, Uviéu y Avilés.

Contador Estadistiques