Fina’l plazu pa presentar trabayos al II Premiu de Novela Curtia Andrés Solar

|
Cartelu II Premiu de Novela Curtia Andrés Solar Santurio

El llunes 26 de setiembre ye’l día últimu pa presentar trabayos al II Premiu de Novela Curtia Andrés Solar. La Conceyalía de Cultura entama esti gallardón con una recompensa de 3.000 euros pa “favorecer y promover la creación lliteraria n’asturianu” y facer alcordanza del de Deva, poeta que nos dexó de manera prematura nel 1984.

Al igual que na primer edición, púnxose como fecha llende’l Día Européu de les Llingües, cola posibilidá d’unviar el trabayu a lo llargo d’esti día al corréu llinguaasturiana@xixon.es, aceptando tamién les cartes unviaes al Rexistru de la Fundación Municipal de Cultura, Educación y Universidá Popular con matasellos de güei. Les obres han ser n’asturianu normativu y inédites con una estensión mínima de 75 páxines y máxima de 130.

El fallu va facese n’avientu, coincidiendo col cabudañu de Solar, fináu n’accidente de tráficu cuando namái contaba con 29 años. El primer autor en llevar esti concursu lliterariu foi Milio Rodríguez Cueto con ‘Fortuna’.

Contador Estadistiques