El VII Festival Arcu Atlánticu enllena la ciudá de música y actividaes

Rodrigo Cuevas abre los conciertos del VII Festival Arcu Atlánticu, certame que fai que Xixón torne a mirar al mar. Va ser la primera de les munches actuaciones previstes ente'l martes y el domingu, con nomes de la talla de Marisa Valle Roso, Dallahan o Tanxugueiras.

‘Mocedá creativo nel Arcu Atlánticu’ ye la temática que protagoniza l'Arcu Atlánticu, col entamu d'actividaes pa conocer iniciatives emprendedores y proyeutos de desarrollu “col envís d'aumentar l'intercambiu d'esperiencies y l'establecimientu de víes nueves de comunicación ente entidaes, mocedá y coleutivos”. El llibru y la edición, el diseñu gráficu y la comunicación, la música, las teunoloxíes nueves, el diseñu, la moda y la imaxe son los temes que, ente otros, va tocar una programación na que les actuaciones en direuto son el so atractivu principal.

A les 20.30 hores nel patiu de Centru de Cultura Antiguu Institutu, va inaugurase oficialmente l’Arcu Atlánticu con un espectáculu multidisciplinar protagonizáu precismanete pola mocedá creativo del país. Darréu, a les 22 hores, Cuevas va llevar el show 'El mundo por montera' a la Plaza Mayor, espaciu que pierde’l toldu nel que destacaba’l logu de la ciudá col topónimu asturianu xunto cola pallabra ‘branu’ pa asitiar otru con ‘Gijón suena bien’.

Nel mesmu llugar van ufrir tamién conciertos el gallegu Cristian Silva (mañana), de la xira ‘Consciente’ de Marisa Valle Roso (xueves), de les tamién gallegues Tanxugueiras (vienres), de los castellanos Fetén Fetén (sábadu) y del espectáculu ‘Raigaños’ de la Banda de Música de Xixón (domingu). Nun va ser l’únicu espaciu pa la música, ya que nel Antiguu Institutu y en dellos puntos de Cimavilla van actuar bandes d’altu nivel de dientro y fuera d’Astuires como La Bonturné, D’Urria, Brez, Aira da Pedra, Ún de Grao o los escoceses Dallahan, que debuten nel país, ente otros munchos.