El topónimu 'Xixón' pierde presencia nes aiciones del Conceyu

|
Navidá Xixón mosaicu

La Navidá xixonesa arrequexa'l topónimu tradicional. La portada del programa festivu pa estes feches presenta namái’l nome ‘Gijón’, a diferencia del añu pasáu cuando usaba la forma billingüe, un escaezu de ‘Xixón’ que se ta viendo n'otros espacios del conceyu.

‘Gijón Navidad 2021-2022’, col logu promocional de la ciudá, ye lo que se pue ver na portada programa navidiegu fechu por Divertia. Tolo contrario que l’añu pasáu, na que rescamplaba ‘Gijón/Xixón’ na tipografía escoyida xunto con un ‘Navidad 2020’ y, na parte d’abaxo d’una semeya de la Casa Conceyu illuminada, el logu cola forma tradicional.

Esti retrocesu na presencia de Xixón nun ye nuevu. Magar que’l Plan de Normalización Llingüística 2020-2023 afita’l “usu del logotipu del Conceyu n’asturianu o billingüe nes dependencies municipales, nos vehículos, paneles y lletreros de víes públiques y edificios municipales” y manda “rotular gradualmente les diferentes dependencies municipales tanto de la Casa Conceyu como de les distintes empreses municipales, empreses mixtes, organismos autónomos (Centros municipales, instalaciones deportives, Museos, oficines d’EMA y Emulsa, Centros de Mayores, Escueles, Parque Móvil Municipal, etc.)”, la realidá ye bien otra.

Asina vemos como nel Palaciu, como amuesa la imaxe qu’acompaña esti testu, namái rescampla'l logu ‘Gijón’, con una presencia mínima de 'Xixón'. Tamién se dio’l casu de la desapaición de la megafonía n’asturianu nel Teatru Xovellanos, baxo xestión de Divertia y con illuminación navidiega anguaño na fachada ensin presencia del idioma, qu’alvierte enantes de cada función que s’apaguen los móviles, dalgo que s’iguó depués de quexes d'usuarios.

Contador Estadistiques