El topónimu tradicional torna a presidir l'escenariu instaláu na Plaza Mayor pal branu

|
El topónimu tradicional torna a presidir l'escenariu instaláu na Plaza Mayor pal branu

L'añu pasáu'l Conceyu emplegara namái'l llogu col nome de llugar castellanizáu.

Col Festival Arcu Atlánticu, que s'inauguró ayeri con un emocionate conciertu de Muyeres que servía de despidida a la xira 'País malva', pue dicise que comiencen les fiestes de branu en Xixón nel centru de la ciudá. Na Plaza Mayor instálase l'escenariu qu'acueye les principales actuaciones del certame y otres munches que preceden a Selmana Grande y les programes pa les propies celebraciones de la ciudá.

La novedá d'esti añu ye la recuperación del topónimu tradicional de la villa, Xixón, na llona que cubre la parte superior de la estructura, que yá se llució hai dos años xunto cola pallabra 'Branu'. Ésta desapaeciera l'añu pasáu, emplegando una col logo de la ciudá col topónimu castellanizáu, Gijón, lo que provocó crítiques por incumplir el Plan de Normalización Llingüística.

Música occitana

El VIII Festival Arcu Atlánticu sigue y esta nueche, a les 22 hores, va actuar na Plaza Mayor La Mal Coiffée, banda vocal conformada por cuatro muyeres procedente d'Occitania. El restu d'actuaciones previstes nel escenariu principal tienen sellu asturianu: B-Linda, el xueves; Anabel Santiago, el vienres; L-R cola propuesta ‘Amigues’ na que van participar Valle Roso, Mapi Quintana, Andrea Joglar, Merce Santos, Silvia Quesada, Marga Lorences, Eva Tejedor, y 6 Riales, amás de Prau Llerón con bailles a pie de cai, el sábadu; y la Banda de Música de Xixón, el domingu.

Contador Estadistiques