El Sporting zarra’l mercáu d’iviernu ensin Gragera y cola incorporación del central Marsà

Dos salíes y trés llegaes. Son los movimientos del Sporting nesti mercáu d’iviernu, nel que pierde al porteru Mariño y al prometedor centrocampista internacional sub-21 Gragera, trespasáu na xornada última al Espanyol, cuando saltó la sopresa de la llegada del central catlán Marsà, incorporación que se suma a la del delanteru chilenu Jeraldino y al del tamién porteru uruguayu De Amores.

Debilitóse’l club roxiblancu de cara a la parte final de la temporada, qu’encara en tierra de naide –decimosegundu a 9 puntos de los puestos d’eliminatories pol ascensu y a 6 del descensu– y con capitán nuevu al frente de la nave, el canariu Miguel Ángel Ramírez, que dio un xiru de 180 graos al mou de xuegu del equipu. La salida de Gragera fíxose finalmente efeutiva na tarde d’ayeri por una cantidá non confirmada oficialmente pero que taría cerca de los 3 millones d’euros por un porcentaxe de los derechos del futbolista y hores depués llegaba a Mareo cedíu ensin opción de compra pero con derechu preferencial el defensa catalán José Martínez Marsà, canteranu del Barcelona de 20 años qu’abandonó’l club al acabar la etapa xuvenil pa probar fortuna nel filial del Sporting Clube de Portugal, llegando a debutar nel primer equipu.

Ensin el yá xugador del Espanyol en Xixón, que comunicara a la propiedá’l so deséu de salir a Primera a pesar de tener un añu y mediu más de contratu, el Sporting pierde a un xugador de gran proyeición yá consolidá nel primer equipu qu’esta temporada amosara polivalencia al ocupar tanto posiciones de centrocampista como de central. La so baxa súmase a la Nacho Méndez, mancáu de llarga duración, y la de Rivera, del que güei s’anunció una lesión que lu va tener apartáu de los terrenos de xuegu delles xornaes.

La falta de gol

La otra salida que provocó una llegada foi la de Mariño, que tomó rumbu a Almería pa incorporar a un equipu de Primera. El gallegu acababa contratu en xunu y perdiera la titularidá nes xornaes últimes.

Pa sustituyilu’l club buscó nel mercáu llatinoamericanu que tanto conoz tanto la propiedá como l’entrenador. Asina aportó a Xixón Guillermo de Amores, porteru urugayu de 28 años que tuvo na prellista del Mundial y procede de Lanús, al que llegó en branu y nel que namái pudo xugar los 3 partíos finales del tornéu últimu al enllazar lesiones, competición na que l’equipu arxentín finó’l 27 de 28.

Y p’acabar cola falta de gol, el gran mal del Sporting nes xornaes últimes, Orlegi Sports confía nun xugador del grupu, el chilenu Ignacio Jeraldino, de 27 años, que vien cedíu pol Santos pero que xugó el tornéu últimu nel Coquimbo Unido del so país, al que llegó cola meta de salvalu del descensu, oxetivu que consiguió. En 14 partíos fixo 4 dianes y dio una asistencia.

Na semeya, Pedro prepárase pa un desplazamientu en llargu nel partíu del domingu n'El Molinón qu'acabó n'empate ensin goles col Málaga CF.