El Sporting va xugar con otru Tercera na primer ronda de Copa

|
Sporting sortéu Copa 2020-2021 primer ronda

Los roxiblancos, a nun repetir col Quintanar del Rey el fracasu del Ruta de la Plata de la temporada pasada col Zamora (2-1).

Podía ser un Tercera o un Segunda División B, pero'l bombu del sortéu celebráu nel estadiu de La Cartuja, en Sevilla, sede de la final de la Copa d'esta campaña, decretó que'l Sporting s'enfrente a un equipu de la cuarta categoría del fútbol estatal. El rival va ser el Quintanar del Rey, conxuntu de Castilla-La Mancha, a partíu únicu na selmana del 16 d'avientu.

D'una población de 7.586 habitantes asitiada en Cuenca, pero na mesma llende con Albacete, esti equipu fundáu nel 1984 llegó a la Tercera División nel 1999, categoría onde compitió mayoritariamente estos años últimos, xugando por xubir en delles vegaes. El Guadalajara arrampuñó-y esti suañu al Quintanar del Rey al ganar por 1-2 nes semifinales de les eliminatories de la pasada temporada.

El conxuntu verdiblancu xuega nel San Marcos, de prau artificial, que cuenta con illuminación, polo que'l partíu podría tener llugar nesti campu de dalgo más de 2.000 espectadores d'aforu al cumplir les condiciones federatives. Anguaño ocupa la tercer plaza del grupu 18-A de Tercera con 8 puntos tres ganar 2 partíos, empatar otros tantos y perder 1, siendo superáu por 1 puntu pol Atlético Albacete y La Roda CF, que cuenten con 1 y 2 partíos menos, de manera respeutiva.

Visita d'un Primera a Asturies

Xunto al Sporting, otres trés equipos asturianos participen na primer ronda de Copa. El Llanera va recibir al Celta (Primera División), el Lealtad al Alcorcón (Segunda División) y l'Uviéu va viaxar a Estremaúra pa xugar col CD Coria (Tercera División).

Na semeya, Antonio Álvarez, entrenador col que Sevilla ganó la Copa de la temporada 2009-2010, nel momentu de sacar la papeleta del Sporting.

Contador Estadistiques