El Sporting sal derrotáu del Tartiere

|

Dos goles del llateral valencianu Mossa permitieron a los azules remontar el tantu inicial d'un Sporting que nun dio la talla nel Carlos Tartiere Nuevu.

José María Angresola, conocíu futbolísticamente como Mossa, convirtióse ayeri nel ídolu nuevu del uviedismu. El llateral que vieno esta temporada del Nàstic firmó los dos d'ayeri que permitieron la victoria por 2-1 del Uviéu na vuelta del derbi asturianu al Tartiere casi quince años depués del duelu últimu, tamién en Segunda.

El Sporting tornó a amosar los mesmos defeutos que nes dos salides anteriores baxo la batuta de Rubén 'Pipo' Baraja –derrotes en Granada (2-1) y Lugo (3-1)–, con una flaxilidá defensiva que permitió a Mossa finalizar dos xugaes ensin oposición nenguna, con Mariño vendíu en dambes. Too ye de dicir que'l segundu gol, namás reanudase'l partíu tres el descansu, foi tres un xut imparable dende fuera del área a la mesma escuadra.

Con poco, sicasí, los roxiblancos llevaron muncho peligru na primer metá nun prau qu'aguantó pese a l'agua de los díes previos. La salida rápida al contraataque, con Jony al mandu, provocó dellos sustos a Alfonso Herrero. D'ún d'ellos llegó'l tantu sportinguista, obra del cangués tres una xugada que comenzó con un disparu al muñecu de Santos y dellos rebotes.

Empate a los 10 minutos

L'allegría nun duró muncho ente los 1.200 aficionaos desplazaos dende Xixón baxo unes fuertes midíes de seguridá, yá que diez minutos depués, nel 31, Berjón coneutó con Mossa nuna de les munches entraes de los azules pela banda derecha del Sporting, y el valencianu crució un disparu al que nun pudo llegar Mariño. Un empate que nun se movería hasta'l minutu 1 de la segunda parte, con una xugada similar iniciada agora na banda izquierda roxiblanca y na que'l d'El Puig de Santa María buscó la so pierna bona.

Esti segundu gol tan tempraneru nun vieno acompañáu d'una reaición de los de Baraja. Falto de creación, el Sporting nun foi quien en nengún momentu a averar el balón al área en situaciones de peligru énte un Uviéu mui ordenáu, y namái cola entrada d'Hernán, que debutó ayeri como roxiblancu –al igual que Nano Mesa, que desaprovechó una ocasión clara de gol–, pudo vese cierta meyoría nel xuegu sportinguista.

El llocal Fabbrini, otru que debutaba ayeri anque nel so casu tres una lesión de llarga duración, tuvo nes sos botes el terceru pal Uviéu na xugada cabera del partíu nuna xuba al remate d'un corner del porteru Mariño, pero l'italianu tuvo mui lentu y Rubén García consiguió arrampuña-y la pelota cuando procedía a disparar a puerta vacía. Al final, victoria d'un Uviéu qu'empata na tabla col segundu clasificáu, el Cádiz, con 44 puntos, rival al que precisamente visita'l sábadu (18 hores) nun partíu que promete ser mui emocionante.

Pela so parte, el Sporting, con 36 puntos, baxa una posición, pa colocase décimu, a 5 puntos de les eliminatories d'ascensu, oxetivu primeru que se marca agora'l club xixonés. El sábadu, a les 16 hores, recibe n'El Molinón al Numancia, equipu qu'ocupa ún d'esos puestos y suma 41 puntos, choque que se presenta vital pa los de Baraja.

Contador Estadistiques