El Numancia espera al Sporting en Copa

Los d'Abelardo van xugar nel fríu Los Pajaritos la segunda eliminatoria de la competición llueu de superar al Beasain na prórroga (2-3).

El Sporting evitó un rival de Segunda en Copa y va enfrentase con un Primera RFEF. Va ser el Numancia, un adversariu habitual nos 25 años últimos que lleva trés temporaes fuera del fútbol profesional.

La última eliminatoria en Copa ente los dos conxuntos foi na 2018-2019, tamién a partíu únicu en Los Pajaritos, con victoria por 1-2 pal Sporting con goles d'Higinio en propia y Pelayo Morilla. L'equipu sorianu vien agora d'eliminar a l'AD San Juan por 0-2, pero nun ta llevando una bona temporada al dir en decimoquinta posición, la que marca la salvación, nel grupu 2 con 13 puntos, a 4 de la promoción pol ascensu y empatáu col Sabadell, primeru de los equipos en descensu.

Iñaki Bea, seleicionador hasta la selmana pasada de República Dominicana, ye téunicu nuevu del Numancia en sustitución de Diego Martínez Ruiz y tuvo en Navarra viendo'l partíu de Copa. Nun va poder contar de momento con Mateo Arellano, canteranu del Sporting con una lesión de llarga duración, nuna plantía con xugadores con esperiencia en Segunda como'l llateral derechu Borja San Emeterio, el central Gorka Pérez o'l delanteru Mario Barco.

El partíu ente sorianos y xixoneses va tener llugar la selmana del 21 d'avientu a partíu únicu en Los Pajaritos, onde s'esperen baxes temperatures. De pasar, los d'Abelardo tendríen como rival otru Segunda o un Primera.

Na semeya, Cedric, delanteru del Real Racing Club, muestra la papeleta del Sporting nel sortéu d'esta tarde na Ciudad del Fútbol de Las Rozas.