El Mavi clasifica pa la 'final a ocho' de la Copa

|

Les xixoneses fixeron valir el valor doble de los goles fuera de casa tres perder 26-22 col Hotel Gran Bilbao-Prosetecnisa Zuazo.

El Mavi Nuevas Tecnologías convirtióse ayeri nel primer equipu del balonmanu femenín asturianu en clasificase pa la 'final a ocho' de la Copa. Y nun lo fixo ensin falta de sufrimientu nun pabellón de Lasesarre con 800 espectadores nes sos graes.

L'equipu dirixíu por Diego Lafuente viaxó a Barakaldo con cuatro goles de renta (24-20) y la igualdá reinó nos primeros minutos del partíu, pero los cincos minutos últimos de la primer parte sirvieron pa que les vasques se metieran na eliminatoria (14-11). Tres la reanudación, el Zuazo nun consiguía despegase nel marcador, namái consiguiendo rentes de cuatro goles nel tramu final del partíu.

Con 26-22, y depués de les que l'equipu de La Calzada fallara un ataque, el Zuazo tuvo na so mano'l pase a la fase final, pero el llanzamientu de Buforn estrellóse nel poste. D'esta forma, el Mavi consiguía un ésitu perimportante pal balonamnu femenín asturianu nuna temporada espectacular, yá que nel so segundu añu na categoría máxima ocupa la quinta plaza, cola permanencia yá en bolsu.

En Málaga

La 'final a ocho' de la trentenu novena edición de la Copa va disputase en Málaga del 20 al 22 d'abril. Amás del equipu xixonés, algamaron la clasificación el Rincón Fertilidad Málaga (organizador), el Rocasa Gran Canaria Ace (actual campeón), el Super Amara Bera Bera, el Mecalia Atlético Guardés, l'Aula Alimentos de Valladolid, el Godoy Maceira Porriño y el Canyalemar Valencia.

Contador Estadistiques