Dos cuentacuentos, actividaes úniques n’asturianu nel programa navidiegu del Botánicu

|
Arfueyu

Dos úniques actividaes n’asturianu –que tamién se ponen en castellanu– inclúinse nel programa Navidá nel Botánicu 2022/23. Ye’l cuentacuentos ‘Histories del Arfueyu’, de Factoría Norte, y ‘La maxa del Botánicu’, d’El Circo Bajo el Tejado, mentes qu'un eventu familiar y les cinco visites guiaes restantes son namái en llingua castellana.

La Navidá tamién se celebra nel Xardín Botánicu Atlánticu, que prepara una programa especial pa estes feches tan especiales. Van arrancar el día 16 cola apertura de les visites al Belen Municipal Monumental creáu por Miguel Álvarez ‘El Ponticu’ con 32 figures a tamañu natural qu’instala l’Asociación Belenista de Gijón, y va poder visitase hasta’l 8 de xineru de 10 a 18 hores –accesu últimu a les 17.15 hores–.

El domingu 18 va ponese a les 16.30, 17 y 17.30 hores el cuentu n'asturianu ‘Histories del Arfueyu’ sobre esti personaxe, mentes que pela mañana va ser en castellanu (12.30, 13 y 13.30 hores). Con mesmos horarios va contar ‘La maxa del Botánicu’, que ta programáu pa los díes 24, 26, 27, 29 y 31 d’avientu, y 2 de xineru.

Les visites guiaes van tener llugar en diferentes xornaes y, amás d’una xeneral a la instalación los llunes 26 y 2 de xineru, son ‘El entorno cantábrico’, ‘La factoría vegetal’, ‘El Jardín de la Isla’ y ‘El itinerario atlántico’. Completa esta iniciativa del Botánicu l’actividá familiar ‘En busca de las plantas de la Navidad’.

L’accesu estos díes va ser de baldre –el llunes 19 ye la única xornada na que va tar peslláu– pa visitar el belén y participar nes diferentes eventos programaos. L’aforu en toos ellos ta llendáu, polo que ye necesario inscripción previa nel númberu de teléfonu 985.185.130.

Contador Estadistiques