Cultura Peatonal lleva actividaes n’asturianu o sobre cultura asturiana a parques y requexos

El programa Musica Peatonal, que se celebró del 21 al 30 de xunu, conviértese en Cultura Peatonal, ampliando les actividaes musicales con baille, artes escéniques y xuegos tradicionales. Nesta ocasión tolos eventos, mediu centenar, van ser n’asturianu o sobre cultura asturiana y van desendolcase dende esti llunes al 7 de setiembre.

La Fundación Municipal de Cultura, Educación y Universidá Popular entama esta iniciativa nueva que va tener como sede parques y requexos del conceyu en collaboración cola Oficina de Normalización Llingüística. Los Xardinos de Samuel González Granda (El Polígono), el parque d’Antonio Ortega (Montevil), el Quioscu la Música de Begoña, el parque del Dr. Eguilburu Banciella (El Natahoyo), la pista polideportiva de Portuarios y la de Nuevu Roces, L’Arbeyal (La Calzada), la plaza la Ilesia d’El Poblao de Santa Bárbara, el parque Salvador Allende (Roces), el parque Tomás Zarracina, el parque Plaza de las Madres de Mayo (Laviada), el parque xunto al CP Tremañes, Los Pericones (Ciares), el parque de Montiana, el Parque Fluvial de Viesques, la plaza de les Antigües Escueles (Pescadores) y la plaza’l Mercáu de La Camocha (Vega) son los llugares non avezaos a acoeyer esti tipu d’aciciones cultures que van contar con actividaes a lo llargo d’estos 10 díes.

L’oxetivu ye averar a tolos xixoneses la cultura asturiana al traviés de grupos de baille, bandes de gaites y músicos del conceyu, teatru n’asturianu pa neños y adultos, y xuegos tradicionales. Yeppah Títeres, n’El Polígono de Pumarín cola obra ‘¡Como te lo cuento!, y l’Asociación Cultural Esvilla, en Montevil con xuegos tradicionales, van abrir Cultura Peatonal el llunes a les 12.30 hores, a les que van siguir otres 48 actividaes nos diez díes de programación.

Na semeya, el conceyal de Cultura, Manuel Ángel Vallina, y la responsable de la Oficina de Normalización Llingüística, María Xosé Rodríguez López, xunto al pie col cartelu de Cultura Peatonal, esta mañana nel parque de Zarracina acompañaos por representantes de les compañíes Luz de Gas y Teatro del Cuervo, del Grupu Folklóricu El Xolgoriu y de l’Asociación de Coros y Danzas Jovellanos, ente otros.