Boni Ortiz va falar sobre'l grupu La Máscara y los teatros de cámara ente'l 1950 y el 1970

|

L'Asociación Cultural Ástura entama la so charra mensual sobre cultura asturiana.

L'escritor y investigador de la historia del teatru n'Asturies, Boni Ortiz, ye'l convidáu nesta ocasión por esti coleutivu que tolos tercer martes de cada mes pon una conferencia nel llar social del Atenéu Obreru de Xixón (Cuadonga, 7). Nesta ocasión el nome de la intervención ye 'TEUs y Teatros de Cámara n'Asturies (1950-1970)'.

"Ente eses dos décades el teatru y la so creación constituyeron, p'amplios sectores de la mocedá asturiano, el marcu de les primeres esperiencies de trabayu coleutivu, de rellaición cola lliteratura, cola cultura crítica; mozos qu'en munchos casos evolucionaron en direiciones diverses de la creación artística, del compromisu social y políticu, o de la simple formación personal", espliquen dende la organización. Aquelles esperiencies diben ser, tamién, "la continuación d'una renovación escénica iniciada col sieglu XX pol puxu de los nuevos públicos populares qu'accedíen al ociu, los cafés, el teatru..., por mor del descansu dominical y la mengua de les xornaes", situación frenada pola Guerra Civil y que nun se retomaría hasta la década de los 50 "polos TEUs (Teatro Español Universitario) y los grupos de Teatru de Cámara".

N'Asturies el grupu de teatru de cámara de referencia foi La Máscara, de Xixón, "ensin desmerecer los numberosos TEUs d'Uviéu". La Máscara fixo'l primer montaxe asturianu d'una obra de Valle Inclán, 'La Marquesa Rosalinda', y montó, y inclusive tornó, a autores destacaos de les vanguardies europees como Beckett, Ionesco o Anouilh, amás d'a Arthur Miller, Williams y O‘Neill, y autores estatales como Alfonso Sastre, Carlos Muñiz, Buero Vallejo o Arrabal.

Los organizadores tamién destaquen la esperimentación en téuniques de la pantomima fecha pol grupu xixonés col montaxe, nel 1959, de, '¿Quiere Ud. Jugar con mí?', de Marcel Achard, "y otres munches iniciatives absolutamente novedoses nel panorama teatral español". Ortiz va repasar esta época y la importancia que tuvo tanto La Máscara como los TEUs d'Uviéu mañana, a les 19.30 hores, nuna actividá con entrada llibre.

Contador Estadistiques