Xixón Tours: iniciativa pa conocer más fondamente aspeutos y hestories del conceyu n’asturianu

|
Ruta 'Xixón mete mieu' Xixón Tours

La iniciativa Xixón Tours ta acabante d’echar a andar con trés rutes temátiques programaes pa esti mes. Esta iniciativa permite conocer más fondamente’l conceyu con visites guiaes programaes por espertos que se van desendolcar en llingua asturiana dafechu.

Destinaes tanto a xixoneses como ciudadanos asturianos de fuera del conceyu y turistes que quieran conocer aspeutos diferentes de Xixón mientres s’averen a la llingua llariega, les rutes entamaes “pretenden buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos”. Arantza Margolles, Daniel García de la Cuesta y Inaciu Galán, como direutor, responsabilizáronse del desendolcu de les mesmes, que lleven el nome de ‘Xixón mete mieu’, ‘Escritores n’asturianu en Xixón’ y ‘Muyeres na hestoria de Xixón’.

El miércoles 19, a les 19 hores, va tener llugar la estrena de la iniciativa con ‘Xixón mete mieu’, ruta que va averar a los y les visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes que mos van llevar n'horariu nocherniegu a conocer los sitios más escuros, terroríficos y misteriosos de la hestoria de la ciudá. Ésta salida va repetise’l sábadu 22 a la mesma hora.

Lliteratura asturiana y muyeres

‘Escritores n’asturianu en Xixón’ va llevar a los sos participante a conocer el desapaecíu quioscu de Pachín de Melás na plaza del 6 d'agostu; el Teatru Xovellanos, onde s'estrenaron munches obres d'Eladio Verde; el conventu de Cimavilla onde tuvo Xosefa Xovellanos; y espacios qu'apaecen na obra d'autores contemporáneos como María Teresa González, Pablo Antón Marín Estrada o Vicente García Oliva, esto ye, llugares qu’escuenden trozos de la hestoria de la lliteratura asturiana. Esta ruta ta programada pa xueves 20 a les 18.30 hores y pal sábadu 29 a a les 12 hores.

Completa la ufierta ‘Muyeres na hestoria de Xixón’, con salides el domingu 23 al meudía y el xueves 27 a les 18.30 hores. Nella va falase de muyeres importantes na ciudá como Xosefa Xovellanos, Aurora Sánchez, Corín Tellado, María González La Pondala, Concha Mori, Pepa Osorio o María Teresa González, ensin escaecer a los coleutivos de muyeres anónimes que tanto marcaron el carácter d'esta villa, como les cigarreres o les pescaderes, y tradiciones como Les Comadres.

Les visites tienen un costu de 5 euros pal públicu xeneral y de 3 euros pa menores de 18 años y grupos escolares o xenerales de más de 15 persones, que se pagarán nel momentu, mentes que pa la reciella hasta los 12 años ye de baldre. Pa participar nesta iniciativa que cuenta col sofitu de la Oficina de Normalización Llingüística de Xixón ye imprescindible acutar plaza na web de Xixón Tours con un día d’antelación.

Contador Estadistiques