Xixón avanza na ellaboración del Plan de Normalización Llingüística

Una comisión del Conseyu Asesor de Llingua Asturiana lleva cuatro sesiones de trabayu pa la ellaboración del Plan de Normalización Llingüística que sustituya al que tuvo vixente pal periodu 2020-2023. Los llabores yá tán avanzaos y nunos meses podría llevase a Plenu.

Ye los martes cuando tán celebrándose estos aconceyamientos, nel que ta presente Ana Montserrat López Moro, conceyala de Cultura, Mocedá y Museos. Nesti tiempu avanzóse de manera considerable, polo qu’hai optimismu en que sía una realidá pronto.

El borrador nel que se ta trabayando va dir depués al Conseyu Asesor pa tratar posibles modificaciones, un procesu que se va completar cuando’l testu definitivu aporte a Plenu pa la so aprobación definitiva. Na llexislatura anterior el Plan de Normalización salió alantre con namái un votu en contra, el de VOX, con PSOE, Izquierda Xunida, Podemos y Foro posicionándose a favor y PP y Ciudadanos na astención.

Na imaxe, aconceyamientu del Conseyu Asesor de la Llingua Asturiana de Xixón. Semeya d'Iniciativa pol Asturianu.