“'Voces' ye una referencia importante pa la sociedá asturiana pa conocer el patrimoniu de so”, apunta Xulio Viejo

|
Xulio Viejo 'Voces' Xixón, con Fernado Padilla y Alberto Ferrao

La esposición ‘Voces. La llingua n’Asturies al traviés de los sieglos’ yá ta abierta al públicu nel patiu del Centru de Cultura Antiguu Institutu, onde se va poder visitar hasta'l día 29. El so coordinador ye Xulio Viejo, que la definió como “una referencia importante pa la sociedá asturiana pa conocer el patrimoniu de so”.

El profesor universtariu participó esta mañana na inauguración de l’amuesa xunto col conceyal d’Educación y Cultura, Alberto Ferrao, y l’entovía direutor xeneral de Planificación Llingüística y Normalización, Fernando Padilla. Ente’l númberosu públicu presente hebo representantes del mundu de la cultura, como’l cantante Toli Morilla o’l cineasta Pablo A. Quiroga, y los ediles Yolanda Huergo (Podemos-EQUO), Eladio de la Concha (VOX), la ex responsable de Cultura Ana Montserrat López Moro (Foro) y el socialista Santos Tejón, conceyal de Promoción Económica, Emplegu, Turismu y Comerciu Llocal.

El primeru n’intervenir foi Ferrao, qu’emplegó la llingua asturiana pa presentar l’actu y defender la tresmisión del idioma, pa siguir Padilla, que señaló que “l’oxetivu d’esta esposición yera que llegara a la mayor cantidá de xente posible, polo que se fixo itinerante, y espero que preste en Xixón tanto como nos otros llugares per onde pasó”. Éstos foron Uviéu, en dos ocasiones (Muséu Arqueolóxicu y Facultá de Filosofía y Lletres), Santolaya y Cangas del Narcea.

L’encargáu d’esplicar el conteníu de ‘Voces’ foi’l so coordinador, Viejo, qu’acudió a Xixón acompañáu de les dos persones que collaboraron con él na ellaboración de la parte académica de la esposición, Ramón d’Andrés y Roberto González-Quevedo. El profesor universitariu destacó’l rigurosu discursu cientifícu d’una amuesa que cuenta la historia social y cultural d’Asturies dende la perspeutiva de la llingua al traviés de dellos panales triangulares, audiovisuales y dellos materiales complementarios, y que definió como “una referencia importante pa la sociedá asturiana pa conocer el patrimoniu de so”.

Visites guiaes de baldre

La esposición ‘Voces. La llingua n’Asturies al traviés de los sieglos’ va poder visitase hasta’l xueves 29 nel Antiguu Institutu. L’horariu d’esta instalación municipal ye de 9 a 21.30 hores, de llunes a vienres; de 10 a 14 y de 16 a 21 hores, los vienres; y de 10 a 14 hores, los domingos.

Esiste la posibilidá de participar en visites guiaes, de baldre, los díes siguientes: mañana (11 hores), el miércoles 21 (18 hores), el vienres 23 (11 hores) y el miércoles 28 (18 hores). El máximu de persones en cada grupu ye de 15, polo que ye necesariu acutar plaza pa participar al traviés del corréu electrónicu llinguaasturiana@xixon.es.

Na semeya, Viejo mientres la so intervención, con Padilla y Ferrao detrás.

Contador Estadistiques