Visita solidaria a Cimavilla esti sábadu

|
Visita solidaria a Cimavilla esti sábadu

Toles perres recaudaes van pa la Fundación por la Acción Social Mar de Niebla.

Percorrer el cascu antiguu de Xixón, el barriu de Cimavilla, y al mesmu tiempu ser solidariu. Ye la propuesta pa esti mes d'abril que forma parte del ciclu de visites guiaes solidaries que Xixón Turismu entama nel 2019.

Esti sábadu al meudía entámase la cabera de les cuatro programaes esti mes, na que se van amosar los edificios y requexos más emblemáticu del barriu altu. La visita sal de la oficina turismu (InfoXixón) de Fomento y pasa pela plaza'l Marqués, la plaza Mayor, Campu Valdés, plazuela Xovellanos –inclúi un percorríu guiáu pel Muséu Casa Natal de Xovellanos–, Torre'l Reló y restos de la muralla romana, plaza d'Arturo Arias, plaza la Soledá, capiella la Soledá, Cuesta'l Cholo y la escultura del Nordés.

Pa finar, va xubise a L'Atalaya pa finar na escultura 'Elogio del horizonte' d'Eduardo Chillida, completando asina una ruta de 2 hores de llargor. El costu de la visita ye de 5 euros y pa participar ye necesario inscribise n'InfoXixón, nel corréu electrónicu infogijon@gijon.info o nel númberu de teléfonu 985.34.17.71.

Una temática cada mes

'40 visites al añu, un tema por mes', ye'l programa de visites guiaes solidaries qu'entama Xixón Turismu al traviés d'InfoXixón a lo llargo del 2019, con una temática estremada cada mes. Tolo recaudao nes va destinase a delles aiciones de responsabilidá social que, nel casu d'abril va dir pa Fundación por la Acción Social Mar de Niebla, que tien l'oxetivu de "trabayar la inserción social, llaboral y cultural de persones preferentemente en situación de vulnerabilidá dende un marcu socio-educativu y normalizáu".

Semeya obra de FDV baxo llicencia CC BY-SA 3.0.

 

Contador Estadistiques