Una esposición repasa los 15 años de la normalización llingüística en Xixón

|
Una esposición repasa los 15 años de la normalización llingüística en Xixón

El Centru de Cultura Antiguu Institutu acueye hasta'l 17 de xineru una esposición, acompañada d'un videu, que repasa los 15 años de la normalización llingüística nel conceyu. N'ochobre del 2013 echó a andar la Oficina Municipal de de la Llingua de Xixón, anguaño nomada Oficina de Normalización Llingüística.

El visitante va poder conocer toles iniciatives, campañes y proyeutos entamaos dende esti organismu dende los sos comienzos nun despachu de la Conceyalía d’Educación y Cultura de l’Antigua Pescadería, con Carmen Rúa como edil, hasta anguaño, cuando'l SNL xixonés ocupa un sitiu dignu nel propiu Antiguu Instituto, na so entrada, y visible pa la ciudadanía. Dende esi momentu una persona, María Xosé Rodríguez López, la so responsable, esforcióse pa facer muncho con poco acompañada d'un equipu que foi medrando colos años y que nestos momentos ta formáu por una alministrativa, un téunica de normalización y una becaria.

L'amuesa dívidese en delles estayes, que comiencen con unos paneles que resumen la historia de la Oficina de Normalización Llingüística. A ellos siguenlos dellos sobre l'alministración pública, la estaya socieconómica, la estaya sociocultural, la tresmisión xeneracional, la enseñanza, la mocedá y el deporte.

Acompaña la esposición un videu de 15 minutos de llargor con intervenciones de xixoneses venceyaos cola llingua asturiana como Vicente García Oliva, David Guardado, Iris Díaz Trancho o Inaciu Galán, ente otros. L'horariu pa poder visitar esta instalación, asitiada na sala 3 del centru cultural, ye'l siguiente: de 18 a 21.30 hores, de llunes a vienres; de 11 a 14 y de 16 a 21.30 hores, los sábados; y de 11 a 14 hores, los domingos.

Na semeya, Rodríguez López, nel centru xunto a la conceyala d’Educación y Cultura, Ana Montserrat López Moro,na inauguración celebrada na mañana d'ayeri.

Contador Estadistiques