Un stand pol asturianu na Feria de Muestres de Xixón

|
Un stand pol asturianu na Feria de Muestres de Xixón

Iniciativa pol Asturianu tien un stand con seis empreses comprometíes col idioma na Feria Internacional de Muestres d'Asturies.

Iniciativa pol Asturianu inaguró un stand na edición d'esti añu de la Feria de Muestres d’Asturies. Un espaciu que la organización quixo compartir con empreses comprometíes col asturianu y que va da-y visibilidá y presencia al asturianu nel ámbitu socioeconómicu a lo llargo de les más de dos selmanes que dura l’eventu, nes que van pasar cientos de miles de persones pel recintu ferial xixonés. 

Xunto a l'asociación van tar presentes les empreses Ediciones Trabe, Saltadera,Pintar-PIntar, Trebeyos, Miguina de pan y CuatroGotes Producciones. Estes empreses son parte del texíu empresarial que vien trabayando dándo-y normalidá al asturianu nos sos ámbitos.

“Pa Iniciativa pol Asturianu esti ye un pasu perimportante, yá que vamos consiguir una visibilidá que nunca enantes fuera posible pa nós, tando nun eventu pel que pasen cásique tolos asturianos y asturianes, amás de miles de turistes que tán n’Asturies per estes feches”, esplicó Inaciu Galán, presidente d’Iniciativa pol Asturianu. “Compartir l’espaciu con estes empreses va permitir que tengamos una imaxe de normalidá énte la sociedá, asina como que se visibilice que l’asturianu ye una ferramienta que non solo ye un patrimoniu cultural, sinón tamién una ferramienta que crea empléu y xenera riqueza”, esplicó Galán.

El stand na FIDMA va cuntar con actividaes como puede ser la grabación del programa de radio Iniciativa pol Asturianu nes ondes y la canal de tv per internet Alderiques d’Asturies. Amás de sorteos, firmes de llibros, xuegos tradicionales y otres iniciatives que van animar la presencia de la organización y les empreses na Feria Muestres.

Dende Iniciativa pol Asturianu quieren recordar que como ye norma na so asociación nun reciben nenguna ayuda pública pa la organización de les sos actividaes y tampoco nesti casu de la organización de la Feria.

Contador Estadistiques