Un Sporting reforzáu quier siguir el camín marcáu la temporada pasada

|
Dorsales Sporting 21-22

El domingu arranca la Segunda pal Sporting cola visita del Burgos CF a El Molinón. David Gallego cuenta con un equipu con más fondu d’armariu que l’añu pasáu col retu d’escaecer la falta de Manu García y siguir la dinámica p’aspirar a tar na zona noble de la tabla.

Llueu de raspiar la clasificación pa les eliminatories pol ascensu, finando sétimu a 2 puntos del Rayo, equipu que daría’l saltu de categoría, David Gallego afronta la so segunda temporada al frente del Sporting ensin el so xugador de más nivel, cedíu al Alavés, pero con un equipu más compensáu. Vienen a reforciar l’equipu Christian Rivera (Las Palmas) –únicu en propiedá–, l’ucranianu Kravets (Leganés, última temporada cedíu nel Lech Poznan polacu), Berrocal (Sevilla, Mirandés), Fran Villalba (Birmingham City, UD Almería) y el panameñu José Luis Rodríguez ‘Puma’ (Alavés, Lugo).

Ente les baxes rescampla d’igual forma la de Javi Fuego, que se retiró depués de nun recibir ufierta de renovación magar la importancia que tuvo la campaña pasada nel equipu y el so lideralgu nel vestuariu. Tamién la de Carmona llueu de 9 años de roxiblancu, anque el balear nun contó cola confianza de Gallego.

El primer rival de los xixoneses, con unos 12.000 espectadores n'El Molinón –40 por cientu del aforu–, va ser el Burgos CF (domingu, 17 hores), equipu que torna a la categoría depués del descensu alministrativu de la 2001/2002 al nun convertise en Sociedá Anónima Deportiva (SAD). Na plantía castellana hai vieyos conocíos de l'afición asturiana, como l'ex canteranu Claudio o Saúl Berjón.

Na imaxe, dorsales del Sporting pa esta campaña.

Contador Estadistiques