Soliciten la posibilidá de facer el pagu de Xixón Bici cola Tarxeta Ciudadana

Convocatoria por Xixón recuerda que "non tol mundu dispón de tarxeta bancaria".

Javier Suárez Llana, voceru municipal de la coalición d'Izquierda Xunida (IX), Más País y Izquierda Asturiana (IAS), solicitó ayera a la conceyalía de Tráficu, Movilidá y Tresporte Públicu qu'habilite'l pagu con Tarxeta Ciudadana nel serviciu Xixón Bici como alternativa al pagu actu col oxetivu d'ameyorar l'accesibilidá al serviciu. “Anguaño oblígase a facer el pagu al traviés d'una tarxeta bancaria, de la que non tol mundu dispón, xenerando asin una barrera nel accesu a un serviciu públicu. L'aplicación yá permite rexistrar la Tarxeta Ciudadana pa entamar y finar viaxes, polo que nun debería resultar mui complicao habilitar tamién la posibilidá de pagu”, esplicó'l conceyal.

Nesi sen, que recuerda que la Tarxeta Ciudadana utilízase yá pa pagar n'otros servicios municipales. Ye'l casu de los autobuses d'EMTUSA.

Iniciatives a la Comisión de Seguridá Ciudadana

L'edil tamién anunció la presentación na Comisión de Seguridá Ciudadana, Tráficu y Participación Ciudadana del vienres d'una iniciaiva que plantega la posibilidá de que'l tresbordu de baldre de EMTUSA, que permite'l cambiu ente llinies distintas per un tiempo de 45 minutos, permita también el cambio al serviciu de bicicleta compartida. Considera que “sería una manera de favorecer la intermodalidá urbana ente dos modos de movilidá sostenible que son amás servicios públicos municipales”.

Amás pide que s'estudie la opción d'afitar tarifes combinaes pa los futuros aparcamientos disuasorios que sirvan pal pagu del parking y l'usu del serviciu Xixón Bici, de forma que “con un único ticket puedas dexar el coche nun aparcamientu a la entrada de la ciudá y llegar al centru en bici pública. El conceyal de Tráfico anunció a lo primero d'añu una tarifa combinada d'aparcamientu disuasoriu y billetes d'autobús d'EMTUSA; trataríse de facer dalgo asemyao dando la opción d'escoyer ente bicicleta o autobús pa llegar al centru de la ciudá”, apuntó Suárez Llana.