Rubén Baraja ye'l nuevu entrenador del Sporting

|

Rubén, el 'Pipo', Baraja ye'l téunicu escoyíu pol Sporting pa sustituyir a Herrera.

La direición deportiva del equipu xixonés pasa d'apostar pola veteranía del Herrera a reforciarse con un entrenador de poca esperiencia na categoría. Baraja, depués d'entrenar un partíu al Valencia Mestalla, dio'l saltu a Segunda División na temporada 2015-2016 de la mano del Elche, col que finalizó undécimu.

La temporada pasada, tres refugar la renovación col club ilicitanu, sustituyó'l 8 de payares a José Ramón Sandoval al frente del Rayo, ensin poder acabar la temporada al nun reconducir la trayeutoria del conxuntu de Vallecas nes 13 xornaes que tuvo nel bancu: 3 victories, 4 empates y 6 derrotes. Míchel, actual entrenador de los madrilanos, foi'l relevu de Baraja en febreru.

El Sporting ocupa, depués de 18 xornaes, el puestu númberu 10 con 24 puntos, a 9 del ascensu direuto y a 5 de les eliminatories de promoción, tres sumar el mesmu númberu de trunfos, empates y derrotes: 6. Depués de ganar nel Reinu de Lleón a la Cultural por 1-2, na xornada 9, l'equipu d'Herrera sumó namái una victoria –na 12 al Almería (2-0)–, 4 empates y 4 derrotes, les dos últimes consecutives. En total, 7 puntos de 27 que dexen a los xixoneses lloñe del oxetivu de la temporada.

Contador Estadistiques