Los socios del UC Ceares defenden el prau natural de La Cruz y llamen a Tuero a respetar los compromisos

|
Los socios del UC Ceares defenden el prau natural de La Cruz y llamen a Tuero a respetar los compromisos

El campu pa la Escuela Mesta de Fútbol del UC Ceares y el Gijón Fútbol Femenino comprometíu pol Conceyu nun terrén asitiáu xunto a la gasolinera de Ciares ta nel aire cola entrada del PSOE nel equipu de gobiernu. Los socios del club refuguen la propuesta del edil José Ramón Tuero d’actuar en La Cruz con prau artificial.

El vienres pasáu la direutiva del Ciares conocía de primer mano l’ultimátum dau pol equipu de gobiernu con respeuto al campu proyeutáu: nun habría instalación pa la Escuela Mesta de Fútbol nel emplazamientu pautáu con Foro, que se cambiaría por una intervención integral en La Cruz pa instalar prau artificial. Nel casu de negativa, el fútbol base del barriu quedaría ensin l’espaciu comprometíu, cola inversión única yá aprobada sobre’l fondu sur del campu, con construcción de vestuarios nuevos, cantina y ampliación de la muria pa iguar les deficiencies del corner que da a la Viesca de la Memoria de Los Pericones.

La reaición primera de los responsables del club foi tresmitir al conceyal Tuero y al so equipu la so decisión de dimitir nel casu de salir alantre’l plan municipal y la necesidá de llevar l’asuntu a l’asamblea yá convocada p’ayeri. La respuesta d’ésta foi contundente tres un alderique llargu: 58 de los socios presentes refugaron camudar el prau de La Cruz, por 4 que s’amosaron favoratibles, con 4 astenciones.

Comunicáu oficial

Hores depués el Ciares asoleyó un comunicáu nel que tresllada al Ayuntamientu que “escaeza cualesquier actuación nel campu de La Cruz, onde’l club xuega los sos partíos dende que fora construyíu polos sos socios –yá depués espropiáu pol Conceyu–, que pase pola eliminación de la yerba natural y la instalación de prau artifical”. D’esta manera pretende caltener la filosofía del proyeutu aniciáu nel 2011, cuando un grupu de socios rescató al equipu de la desapaición, basáu “na dignificación del fútbol semi-profesional, la recuperación de masa social, el venceyamientu ente vecinos del barriu tres el so club de fútbol –nuna época d’individualismu brutal– ya la recuperación de la identidá de barriu”.

El modelu de negociu instaláu nel fútbol base al traviés de los praos artificiales, con capacidá pa usase les 24 hores del día, ye refugáu dafechu pol club, que considera esta superficie negativa pal proyeutu dos equipos senior que xuegen en La Cruz, el Ciares y el Xixón, y pa los propios deportistes, pol aumentu de les lesiones que provoca dicha superficie. Amás la direutiva recuerda la inversión de 23.000 euros fecha l’añu pasáu nel campu pa la instalación de riegu y agüeres, amás de duplicase la inversión nel so caltenimientu pa facilitar una práutica afayadiza del fútbol nel mesmu.

“Pa que pudiera crecer en visibilidá y asistencia a los sos partidos, sacamos al Gijón F.F. d’un campu de yerba artificial destináu al fútbol base, y agora quieren que la yerba artificial-yos persiga pa terminar na mesma situación que taben”, sigue’l comunicáu, recordando que “les instalaciones que se solicitaran pa la Escuela Mesta de Fútbol contemplaben un nuevu modelu de xestión onde’l Patronatu Deportivu del Conceyu tuviera poder de decisión so’l usu de les mesmes pa evitar cualesquier movimientu especulativu, y que nos permitieran xunto col Gijón Fútbol Femenino desendolcar un proyectu pioneru que como puede vese xeneró interés munchu más allá de les llendes del barriu, pero enxamás al costu de poner en riesgu a un club con más de 70 años d’hestoria que vive una época dorada no social ya deportivo”. Poro, el Ciares llama al Conceyu “a sentase a dialogar p’atopar una solución satisfactoria. Creyemos qu’hai alternatives que son totalmente vidables, inclusive con un costu menor, y que nun implicaríen la desapaición del nuesu fútbol base y la Escuela Mesta de Fútbol”.

D’igual forma, soliciata que se reactiven “los arreglos que taben en marcha pal nuestru campu yá que tenemos planificada la temporada en base a les feches alcordiaes pa los mesmos”.

Na semeya, un momentu de l'asamblea ordinaria del Ciares celebrada ayeri en La Cruz.

Contador Estadistiques