L’equipu de gobiernu municipal presenta un borrador de presupuestos de 247 millones

|
Marina Pineda y Aurelio Martín borrador presupuestos 2022

Marina Pineda y Aurelio Martín presentaron el borrador de presupuestos fechu pol equipu de gobiernu municipal pal 2022. Asciende a 247 millones d’euros, 14 más que l’anterior, el del 2020 prorrogáu nel 2021, lo que lu convierten nel mayor de la historia.

El 22 d’avientu van votase en Plenu estes cuentes, que la xunta de gobiernu aprobaría’l 16 de payares. Enantes van producise llargues negociaciones pa sumar apoyos y poder sacar alantre unos númberos que facilite la gobernabilidá, con diferencies con Podemos-EQUO no que correspuende a les ordenances fiscales.

L’añu pasáu’l Conceyu decidió prorrogar los presupuestos por mor de la COVID-19, decisión que l’alcaldesa Ana González Rodríguez pudo sacar alantre gracies a l’astención crítica de Podemos-EQUO y al so votu de calidá na segunda votación. “Ye’l momentu de pasar de la resistencia a la recuperación”, apuntó’l voceru de Xixón pela Izquierda (IX-IAS) y conceyal de Mediu Ambiente y Movilidá sobre unes cuentes pensaes “pa una recuperación económica que nun dexe a naide atrás, fortaleza los servicios públicos municipales y impulse un modelu de ciudá sostenible”.

La inversión cífrase en 22,4 millones d’euros y los presupuestos céntrense en trés exes: bienestar y calidá de vida (30 por cientu), desarrollu sostenible (14 por cientu) y promoción económica y emplegu (14 por cientu). “A esti equipu de gobiernu prestaría-y tener una inversión mui ambiciosa, pero vien marcada polos compromisios adquiríos pol gobiernu anterior”, esto ye, el de Foro, aseguró la conceyala de Facienda, Organización Municipal y Personal.

Contador Estadistiques