La vía de Xove suma un retrasu nuevu y moviliza a vecinos y Conceyu

A los cuatro meses y mediu de retrasu acumuláu, un mes más. El Ministeriu de Tresportes, Movilidá y Axenda Urbana amplió hasta’l 28 de marzu’l plazu a los téunicos p’analizar les ufiertes presentaes, una situación qu’indigna tanto al Conceyu como al movimientu vecinal, qu’estudia movilizaciones de protesta por esta situación.

La vieya demanda d’una carretera qu’enllaz con El Musel pa sacar a los camiones de La Calzada paecía camín de ser realidá en mayu del 2023, cuando se sacó la llicitación, pero los retrasos nos plazos tán desesperando a la ciudadanía y alministración llocal. Otra vez la complexidá téunica de la obra ye la escusa qu’emplega’l ministeriu pa xustificar un aplazamientu nuevu, agora d’un mes, qu’alloña’l 24 de mayu como fecha d’axudicación de los trabayos.

Yera’l 28 de febreru la fecha marcada pol calendariu ministerial pa estudiar les ufiertes que llegaron hasta’l 24 de xineru. Agora ésta asitiase nel 28 de marzu, lo que recibió crítiques de la FAV y del Conceyu, hasta’l puntu d’estudiar movilizaciones.

La obra, con un presupuestu base de llicitación de 285,7 millones de euros, actúa sobre dos quilómetros y mediu ente la carretera ‘GJ-10’ y El Musel, y inclúi la construcción d’un túnel de dos quilómetros hasta la rotonda d’entrada al puertu, con un plazu d’execución de 59 meses. L’actuación va obligar a la esviadura provisional de llinies de ferrocarril.