La Nueche d’Ánimes toma’l Botánicu y El Llano

|
Calabazones nel Xardín Botánicu Atlánticu

El 31 d'ochobre les asturianes y asturianos celebramos la Nueche d’Ánimes, festividá que tien orixe nel cambiu d’añu celta o Samhain. Les escueles del conceyu lleven dellos díes decoraes con calabazones afuracaos, el Xardín Botánicu Atlábtucy entama una programación especial y los vecinos d'El Llano ponen la folixa.

La Nueche d’Ánimes trátase d’una xornada mui presente na nuesa tradición anque anguaño contaminada pola so versión estauxunidense: Halloween. Trátase d’una fiesta de raigón celta na que los espíritus de los muertos tornen al mundu de los mortales.

Ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Los que más viven esta folixa son les escolines y escolinos, con munches actividaes entamaes estos díes en clase. Pero los adultos tamién pueden disfrutar esta nueche y na xornada festiva del Día de Difuntos, 1 de payares.

Nel Xardín Botánicu Atlánticu atopen les xornaes ‘Calabaces y Calavares’, destacando sobre manera la propuesta Lleendes Asturianes de Difuntos mañana, el sábadu y el domingu, con un preciu de 1 euru (imprescindible inscripción previa), o visitar la esposición de calabazones del Botánicu. Les neñes y neños tamién van atopar numberoses actividaes nesta instalación municipal.

Mentes, l’Asociación Sociocultural La Serena celebra 'Samaín' güei onde les piscines con pintacares, talleres y actividaes pa la reciella pela tarde. A les 21.30 hores va celebrase una ceremonia de Nueche d’Ánimes, a la que va siguir la actuación del grupu Assia y del DJ David Dee.

Esti añu, depués de la bona esperiencia del añu pasáu, los vecinos d’El Llano amplíen la folixa hasta’l domingu, con verbenes el vienres y el sábadu con Tekila y Pasito Show, de manera respeutiva.

Na semeya, calabazones nel Xardín Botánicu Atlánticu.

Contador Estadistiques