La decisión del Uviéu de frayar rellaciones sorprende al Sporting

|
La decisión del Uviéu de frayar rellaciones sorprende al Sporting

El club xixonés esparde un videu colos estrozos provocaos polos aficionaos azules n'El Molinón mientres el derbi asturianu.

El comunicáu asoleyáu pol Uviéu esta madrugada, coincidiendo col noventenu tercer aniversariu del equipu azul, pilló de sorpresa al Sporting, que nun recibiera quexa nenguna nin el mesmu día del partíu nin ayeri. "Les rellaciones institucionales col Real Sporting de Gijón, qu'hasta esti momentu foron correutes, van interrumpise d'agora a alantre hasta certificar que los nuesos aficionaos, como parte de la institución que son, reciban un tratu respetuosu, xustu y acorde col que merecen, y col que los sos siguidores recibieron nel Carlos Tartiere", rezaba la nota firmada pol conseyu d'alministración carbayón.

La respuesta nun se fixo esperar y esta mañana'l Sporting asoleyaba tamién un comunicáu nel que llamentaba "fondamente la decisión unillateral del Real Oviedo de frayar rellaciones institucionales, qu'hasta la fecha y al menos nestos dos años nos que compartimos categoría deportiva non sólo foron correutes, sinón mui cordiales, d'ehí la sorpresa por nun tener noticia dalguna nin quexa al respeuto hasta la emisión d'esti comunicáu, impropiu d'un club de la categoría del Real Oviedo. Nun se pue acusar primero y entrugar depués".

Tamién abrió les puertes d'El Molinón p'amosar l'estáu nel que quedó la zona visitantes tres el partíu nel que los roxiblancos superaron al so eternu rival por 1-0. Les quexes del Uviéu centrábense na falta de baños y d'agua mineral, nos cacheos de la seguridá y nun incidente con respueto a los acompañantes del conseyu d'alministración, que'l Sporting retrucó con datos.

Contador Estadistiques